Plantun de Prouvènço

Pèr coumpara dos planto d'encò nostre

Helianthemum syriacum & Plumbago europaea

Helianthemum syriacum

Cistaceae

Noms en français : Hélianthème à feuilles de lavande, Hélianthème de Syrie.

Descripcioun :
La massugueto-de-Sirìo es un pichot aubret que trachis dins li garrigo à roumanin proche de mar, sus marlo, argielo o cauquié douloumitique. Li ramo soun argentado e se roumpon eisa. Li fueio, pelouso, soun proun envertouiado sus lou dessouto e longo de 2,5 à 4 cm. Fai de poulido e pulèu gròssi flour jauno amé de petalo pu longo que li sepalo. Se vèi soulamen en basso Prouvènço, coume à l'entour de Marsiho.

Usanço :
Li massugueto èron acampado en Espagno pèr la farmacìo tradiciounalo e soun couneigudo pèr lucha contro li microbe (poulifenòu).

Port : Aubret
Taio : 15 à 50 cm
Fueio : óupousado
Tipe bioulougico : Camefite
Cicle bioulougico : Planto renadivo

Gènre : Helianthemum
Famiho : Cistaceae

Ordre : Malvales

Coulour de la flour : Jauno
Petalo : 5
Ø (o loungour) flour : 1,5 à 2 cm
Flourido : Printèms - Estiéu

Sòu : Ca
Autour basso e auto : 0 à 100 m
Aparado : Noun
Mai à juilet

Liò : Garrigo
Estànci : Termoumediterran à Mesoumediterran
Couroulougi : Éurimediterranenco
Ref. sc. : Helianthemum syriacum (Jacq.) Dum.Cours., 1802 (= Helianthemum lavandulaefolium DC. )

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.